هەڤاڵ رێکار ئەحمەد وەڵامی پرسیارەکانی نوچەنێت دەداتەوە

پرسیار: دوو سەرکردەی حزبی کۆمۆنیست رایدەگەیەنن کە کوردایەتی و بڕوای نەتەوەیی هۆکاری دروستبونی مافیاو میلیشیایە، ئێوە راتان چییە لەباری کوردایەتی؟ تاچەند دروستە بەو شێوەیە پێناسە بکرێت؟؟

وەڵام: کوردایەتی بزاڤێکی هەقخوازانەی گەلێکی داگیرو دابەشکراوە، لەپێناو ئازادی مرۆڤەکان و رزگارکردنی نیشتمانێک جۆشدراوە، هەزاران مرۆڤی ئازادیخوازو رزگاریخوازو یەکسانیخواز گیانی خۆیان پێشكەش بە بزووتنەوەی کوردایەتی کردوە، هەزاران هەزار کەسیش تێیدا زیانمەندبوون، هەزار گوند وێران و خاپوورکران، دوژمنانی بزاڤی هەقخوازانەی گەلی کوردستان بەمەبەستی لەنێوبردنی نەتەوەی کردو درێژەدان بە داگیرکاری، هەموو شێوازێکی ستەمکاریان پێڕۆکرد؛ بۆ کپکردنەوەی دەنگی ئازادیخوازانی کوردستان، رەشبگیری، زیندانیکردن، لەسێدارەدان، ئەنفالکردن و ژەهرباراندن و رەشەکوژیان درێژە پێدا، بەڵام زۆرداران و ستەمکاران ناکام مانەوە، بۆیە دەبێ مرۆڤی خاوەن ویژدان، مرۆڤی شۆڕشگێر، مرۆڤی یەکسانیخواز و ئازادیخواز بە چاوی رێزەوە لە بزاڤی کوردایەتی بڕوانێت، هەرچەندە لەوانەیە لە قۆناغێکی خەباتی کوردایەتیدا هەندێک هەڵەو کێماسی روویاندابێت، بەڵام کاتێک میلیشیاو مافیا لەلایەن رێکخراوەکانەوە دروست دەبن، ئۆباڵەکەی لە ئەستۆی بزاڤی کوردایەتیدا ناکەوێت، چونکە دەیان نموونەی زیندووی جیهانی هەن کە هەندێک پارت و رێکخراو هەبوونە و بانگەشەی مارکسی و سۆسیالیستیان کردوە بەڵام مافیاو میلیشیایان هەبووە، دەستیان بۆ تاوانی گەورە بردوە، ئایا پۆلپۆتەکان لە پەنای مارکسیزمەوە هەزاران هەزار مرۆڤی سڤیل و لاشەڕیان نەکوشت؟! ئایا رێکخراوە چەپەکانی جیهانی سێ لەپەنای یەکسانیخوازیەوە سەدان کاری تیرۆریستیان ئەنجام نەدا و میلیشیای تایبەت بە خۆیان دروست نەکرد؟!

ئەوانەی پێیانوایە کە بڕوای نەتەوەیی و کوردایەتی هۆکاری دروستبوونی مافیاو میلیشیان، دەبێ لەگەڵ ویژدانی خۆیان دانوستاندن بکەن و خەڵکیش پرسیاریان لێبکات. ئاخر بۆچی دەبێت بزاڤی رزگاریدەری فەلەستین هەقخوازانە بێت لەکاتێکدا بە بڕوای نەتەوەیی گۆشكراوە و باسی عروبە دەکات؟! ئایا بۆچی دەبێت کە بزاڤی رزگاریخوازی ئەریتیریا نەبووبێتە هۆکاری دروستبوونی باندی مافیاو میلیشیا لەکاتێکدا کە بەبڕوای نەتەوەییەوە گۆشکراون و خەباتیان بۆ رزگاری نیشتمانەکەیان کردووە؟؟.. تەنانەت هەندێک رێکخراوی سووری ئەمریکای لاتین لەپەنای بیروباوەڕی مارکسیزمەوە دەیان باندی مافیایان پێکهێناوە، سەدان تیرۆری گەورەیان بەڕێوەبردوە، دەستیان لە کوشتنی سەربازانی دەوڵەت و خەڵکی ئاسایی نەپاراستوە، بازرگانیان بە ماددە هۆشبەرەکانەوە کردوە، بەڵام بەوان بگوترێ شۆرشگێر و ئاماژە بەوە نەکرێت کە ئەوانە بوونەتە هۆکاری دروستبوونی مافیاو میلیشیا؟؟!! ئەوانە و دەیان نموونەی دیکەی زیندوو هەن، بۆیە ناکرێ کوردایەتی بە هۆکاری دروستبوونی مافیاو میلیشیا لێکبدرێتەوە، ئەوانەی ئەو بۆچوونانەیان هەیە هەم ستەم لە خۆیان دەکەن هەم ناهەقی لەبەرانبەر بزاڤی یەکسانیخوازی و بیروباوەڕی مارکسی و سۆسیالیستی دەنوێنن.

بزاڤی ئازادیخوازی و رزگاریخوازی نەتەوە بندەستەکان کە بزاڤی کوردایەتیش یەکێکە لەوان، خۆی لەخۆیدا جۆگەلەێکی روونی بزاڤی یەکسانیخوازی و سۆسیالیستی پێکدەهێنن، چونکە نەتەوە بندەست و داگیرکراوەکان لەدژی رەگەزپەرستی، نابەرابەری، رژێمی داسەپاوی نەتەوەی سەردەست رادەپەڕن و تێدەکۆشن و فیداکاری دەکەن، بەوهۆیەوە هەرگیز ناکرێت ئەو بزاڤە نەتەوەییانە بە رەگەزپەرست ناوببرێن. یان بگوترێ کە بزاڤی کوردایەتی هۆکاری دروستبوونی مافیاو میلیشیان.

پرسیار:

کەوایە وەک سیاسیەکی چەپ پێت وایە بزوتنەوە چەپەکانی دنیاش دوور

نەبوون لە دروستکردنی گروپی مافیاو میلیشیاو زوڵمکردن؟.

وەڵام: بێگومان بەشێک لە رێکخراوە بەناو چەپەکان و بزووتنەوە بەناو کرێکاریەکان دەستیان لە دروستکردنی گروپی مافیاو میلیشیادا هەبووەو زۆرداریان لە دیتراندا کردوە. ناکرێ لەبەرئەوەی کە خۆم بە کەسێکی چەپ دەزانم چاو لەراستیەکان بنوقێنم و داکۆکی لە هەڵەو کێماسی و تاوانەکاندا بکەم. ئێستاش هەندێک رێکخراوی بەناو چەپ لە ئاسیاو ئەمریکای لاتیندا هەن کە برەو بەو دیاردەیە دەن.

پرسیار:

وەک کەسێک کە ساڵانێکە هەم لەشاخ و هەم لەشار سیاسەت دەکەن و کاری رێکخراوەیی و حزبی دەکەن، نەک وەک سکرتێری حزبێک، ئەگەر لەبەڕێزت بپرسین، ئەم جۆرە قسەو لێدوانانە تاچەند لە خزمەتی ئایندەی حزبی کۆمۆنیست دەبێت کەماوەیەکی کەمە مەیدانی دەستیان داوەتەوە خەبات بەڕەسمی؟ ئایا لە ئەنجامی ئەو لێدوانە توندانە چاوەڕێی چیت؟.

وەڵام: هەر حزب و رێکخراوێک ئەگەر بەرنامەێکی راستین و ئامانجێکی رەوای هەبێت، ئەگەر باوەڕی بەبەرنامەکەی خۆی هەبێت ، پەنا بۆ زەقکردنەوەی هەڵەی دیتران نابات، هەوڵنادات لەسەر هەڵەو کێماسی ئەوانی دیکە خۆی قەڵەو بکات، ئەگەرچی لەقاودانی هەڵەو کێماسیەکان کارێکی رەوان بۆ ئاشكراکردنی راستیەکان، بەڵام دەبێ گرەو لەسەر بەرنامەو پڕۆژەکانی خۆی بکات، دەنا لە ئاکامدا قەوانەکە دەسوێ و دووپات بوونەوە بەخۆیەوە دەبینێت و جەماوەریش بێزار دەبێت و لێیدەتەکێتەوە. راستیەکەی لە دواین وێستگەدا ئەوە بەرنامەکانن کە کێبەرکێ و مڵملانێ لەگەڵ یەکتردا دەکەن نەک جوینەوەی قسەی رۆژانە.

لەلایەکی دیکەشەوە ئەگەر لێدوانی تووندی سەرەڕۆیانە بۆ مزاختنی رۆژانە و خاپاندنی جەماوەر بێت، ئاکامی باشی لێناکەوێتەوە، هەروەها تووندڕۆیی و هەڵەشەیی بەخراپ دەشکێتەوە. لەو سۆنگەیەوە پێموایە رەتکردنەوەی بزووتنەوەی کوردایەتی و ئامانجە رەواکانی و هەڵشاخان بە خواستەکانی خەڵک پوکانەوە بۆ خودی حزبەکەیان دەهێنێ و ئەندام و لایەنگرانیشی تێیدا زیانمەند دەبن.

پرسیار:

پێت وایە دەکرێت لەنێو بروای چەپ و مارکسیدا پرسی نەتەوەیی جێی بێتەوە یان ئێوەش وەک هاوڕێیانی کۆمۆنیست لەو پرسە دەڕوانن؟

وەڵام: بێگومان پرسی نەتەوەیی زۆر بە باشی لەنێو ئامانجی بزاڤی کۆمۆنیستی و سۆسیالیستیدا جێی دەبێتەوە، بەتایبەتیش پرسی ئەو نەتەوانەی کە بۆ رزگاری و سەربەخۆیی تێدەکۆشن بەشێکی گرنگی ئامانجی بزووتنەوەی سۆسیالیستەکان پێکدەهێنن. کۆمۆنیسزم ئامانجی بنبڕكردنی چەوسانەوەو هێنانەئارای بەرابەریە، بەڵام کاتێک نەتەوەێکی سەردەست و رژێمێکی داسەپاو ستەم لە نەتەوەێکی بندەست و داگیرکراو دەکەن، کاتێک زۆرداری پێڕۆ دەکەن و ماف و ناسنامەی مرۆڤ و نەتەوەکان ناناسن، کۆمۆنیستەکان بەئەرکی خۆیانی دەزانن بۆ لابردنی ستەم و نابەرابەری لەسەر نەتەوەی ژێردەست دژ بە رژێمە داسەپاوو نەتەوە سەردەستەکان تێبکۆشن، هەر لەو روانگەیەشەوە گرێدانی خەباتی نەتەوەیی و چینایەتی وەک دیوەکانی یەک دراویان لێدێت، ئەمەش وایکردوە کە بەشێک لە حزبە چەپەکانی نەتەوەکانی ژێردەست لەبەرنامەی خۆیدا هاوکاتبوون خەباتی نەتەوەوایەتی و چینایەتی درێژە پێدەدەن. لە پەیڕەی حزبی رزگاریی کوردستاندا هاتووە: { حزبی رزگاریی کوردستان، حزبێکی نیشتمانی دیموکراتی پێشکهوتنخوازه، خهباتی نهتهوایهتی و چینایهتی بهیهکهوه گرێدهدات و لهژیر رۆشنایی فهلسهفهی سۆسیالیزم و یهکسانیخوازیدا ههنگاو ههڵدهگرێتهوه، هاوکات پهیڕهوی له دیموکراسی و سۆسیالیزم دهکات}

پرسیار:

لەم سەروبەندەدا ئێوە وەک یەکێک لە سەرکردەکانی بەرەی چەپ، ئێستا داکۆکی لەکام رایان دەکەی ئەوانەی کە داکۆکی لەکوردایەتی دەکەن، و پێیان وایە بزوتنەوەی کوردایەتی بەرپرس نییە لەهەڵەی حزبەکان، یان لە برادەرانی کۆمۆنیست کەپێیان وایە، کوردایەتی هۆکاری دروستبونی مافیایە؟

وەڵام: ئێمە بزاڤی کوردایەتی بە بزاڤێکی هەقخوازانەی نەتەوەێکی بندەست و داگیرکراو دەزانین کە لە پێناو ئازادی و مسۆگەرکردنی مافی تاکەکانی و لەپێناو رزگاری و سەربەخۆیی نیشتمانەکەی تێدەکۆشێت، بەوهۆیەوە بزاڤی کوردایەتی بەبەرپرسی هەڵەی حزبەکان نازانین، بەڵکو بە پێچەوانەوە ئەوە حزبەکانن کە بە رەفتارو کردەوەکانیان سیمای بزاڤی کوردایەتیان شێواندوە، بوونەتە هۆکارێک بۆ دروستبوونی مافیاو میلیشیا، دەنا بزاڤی کوردایەتی لەو کارە دزێوانە بێبەریە، ئەوانەی بەرد لەو بزاڤە رەوایە دەگرن، یان لە کۆمۆنیزم تێنەگەیشتون یان باوەڕیان بە بەرنامەکانی خۆیان نیەو دەیانەوێ خۆیان لە پشت پەردەی هەڵەی دیترانەوە هەڵنێن و دەست لە سنگی خۆیان بکوتن و بەشان و باڵی خۆیاندا هەڵبڵێن.