رەوشەکە هێور بکەنەوە

مێژووی بیست ساڵی رابردوو پێشانیداوە کە هەمیشە باشووری کوردستان لە رەوشی ئاوارتەدا بووە، دۆخی ئاڵۆزو شێواو بووە، بەڵام رووداوەکانی ئەم دواییەی بادینان جارێکی دیکە و بە شێوازێکی دیکەوە دۆخەکەی ئاڵۆزتر پێشاندایەوە، دەکرێ بڵێین ئەو زەنگە ترسناکە لێیدا کە دەمێکە چاودێرانی سیاسی نیگەرانی لە هەمبەردا پێشان دەدەن و ئاماژە بە هاتنی دەکەن ، بەڵام بەداخەوە دەستەڵاتی سیاسی بە خەمساردیەوە لە ساێدی دا بوو، یان هەر باوەڕیشی پێی نەبووەو پێکەنینی بەو بۆچوونە هاتووەو بە خەیاڵی هەرزەکارانەی چواندوە. ئێستا کە زەنگە مەترسیدارەکە هەموومانی هەژاندووە، دەکرێ بگوترێ کەسێک مابێت و پەی بەو راستیە نەبردبێت کە ئیدی گۆمەکە شڵەقاوە، یان کورد گوتەنی: پوشەکە ئاگر دراوە!! بۆ هێورکردنەوەی دەبێ هەنگاوی خێراو کردەیی بۆ هەڵبگیرێتەوەو چیتر خۆمان بە بەپێکهێنانی لیژنەو پێشکەشکردنی پڕۆژەوە نەخاپێنین. ئیدی کەسێک هەیە کە پێیوابێت ئەو رەوشە ئاڵۆزە بە چاکە بۆ دۆزی کوردستان دەگەڕێتەوە؟! بێگومان هەموومان لە بەراییدا دەبێ بڵێین هەرگیز، چونکە ئەو دۆخە ئاڵۆزو نەخوازراوە لە بەرژوەندی کێشەی گەلی کوردستان و رەوشی باشوور دانیە، گەرەکە بە پەلەو خێراو خۆنەویستانە کار بۆ رەواندنەوەی تەمی ئەو ئاڵۆزیە بکرێ، ئەگەر بۆ جارێکیش بێت، پێویستە پەرژەوەندی تەسکی حزبایەتی شل بکرێتەوەو بەرەو خەستکردنەوەو چڕکردنەوەی بەرژەوەندی باڵای نیشتمان و بەرەوتووندکردنی ئاسایشی نەتەوەیی هەنگاو بهاوێژرێت.

راستیەکەی ئەگەر هێزە دەستەڵاتدارەکانی کوردستان و حکومەتی هەرێمی کوردستان هەنگاوی خۆپارێزی بۆ خامۆشکردنەوەی رەوشەکە هەڵنەگرنەوە، سیناریۆیی ئەو فیلمانە بۆ ئێرەش پەلکێش دەکرێت کە لە دەوروبەردا پێشان دەدرێن، چونکە باشووری کوردستان بە ئیسلامی فەرمانڕەوا گەمارۆ دراوە، لە تورکیا ئەکەپە فەرمانڕەوایە و ئەردۆگان بۆتە شۆڕەسواری مەیدانی ئیسلامی سیاسی، لە رۆژهەڵاتی هەرێمی کوردستاندا، کۆماری ئیسلامی ئێران تەمەنی سی و دوو ساڵەو پڕدەستەڵاتیشە، رەوشی سوریا شلەژاوەو ئیخوان موسلیمین هاوکاری دەکرێن و لە پشتی پەردەوە بۆ هاتنە سەر کورسی دەستەڵات رادەهێنرێن، لە عێراقی عەرەبیدا هێزە ئیسلامیەکانی سوننەو شیعە باڵادەست و فەرمانڕەوان، هەروەها باهۆزی خۆپێشاندان و راپەڕینەکانی وڵاتانی عەرەبی لە بەرژەوەندی هێزە ئیسلامیەکاندا شکاوەتەوە، لە وڵاتانی مەغریب، لیبیا، تونس و میسردا ئیسلامیەکان بەرەو فەرمانڕەوایەتی رێچکەیان گرتووە، جا بۆ سووک کردنی ئەو باهۆزەو، دوورخستنەوەی ئەو پەتایە لە باشووری کوردستان، پێویستە زۆر ژیرانە هاوکێشەکان لێکبدرێنەوە، بە هۆشیاریەوە هەنگاوی خێراو بەپەلەی خۆپارێزی هەڵبگیرێتەوە.

مەبەست و سیناریۆی رووداوەکانی بادینان و ئاڵۆزیەکانی ئەم دواییە هەرچی بووبێت و هەر دەستێک ئەنجامی دابێت، زیانی بە ناوبانگی هەرێمی کورستان و دۆزی گەلی کوردستان گەیاندوە، هەموو ئەوانەشی ترساندووە کە دەیانویست سەرمایەگوزاری لە باشووڕی کوردستاندا بکەن، یاخود مەبەستیان بوو لە رێی سەرخستنی دۆزی کوردستانەوە بەرژەوەندەکانی خۆیان گەورە بکەنەوە و پێگەێکی قایم بۆ خۆیان لە ناوچەکەدا مسۆگەر بکەن.

دۆستانی گەلەکەمان و هاوسۆزانی دۆزی کوردستان چاویان لەوەبوو کە هەرێمی کوردستان وەک ئەزموونێکی دیموکراسی و مۆدێرن لە ناوچەی رۆژهەڵاتی ناڤیندا پێشانی دیتران بدەن، هەرگیز حەزیان نەدەکرد کە گەنجانی کوردستان بڕژێنە شەقامەکان و پەلاماری سێنتەرەکانی مەساج و دووکانەکانی مەیفرۆشتن بدەن. هێزە سیاسیەکانی کوردستان پەرۆشی خۆیان بۆ مسۆگەرکردنی مافی نەتەوەکانی دیکە پێشان دەداو پێداگریان لەسەر پێکەوەژیانی پێکهاتەکان دەکردەوەو بە خاڵی ئەرێنی و درەوشاوە ئاماژەیان پێدەکرد، بۆیە هەرگیز بیر لە بریندارکردنی پێکهاتەیەک نەدەکرایەوە. هێزە سیاسیەکان دیاردەی فرەحزبیان بە ئەرێنی و راست و هاوچەرخانە پێوانە دەکرد، بۆیە هەرگیز ئاوات نە دەخوازرا کە بنکەو بارەگای لایەنێک بسووتێندرێن.

دۆخی ئاڵۆزی باشووری کوردستان لەوە تێپەڕی کردوە کە بە گوتاری تۆ بوویت و من نەبووم، من ستملێکراوم و تۆ ستەمکاریت، چارەسەر بکرێت. لە هەمان کاتیشدا لیژنەکان ناتوانن داڕێژەری سیناریۆکان بدۆزنەوەوە، باوەڕیش ناکرێت کە بکارن تۆمەتبارو تاوانکاران بناسێنن و ئەکتەرەکان رادەستی دادگە بکەن. ئیدی ئەرکەکە سەخت و دژوارتر دەبێتەوە. بەوهۆیەوە دانیشتووانی کوردستان، بە پێکهاتەو هێزەکانیەوە لەبەردەم تاقیکردنەوەێکی کەم وێنەدایە، بۆ سەرکەوتن و تێپەڕاندنی ئەو دۆخە ئاڵۆزە بەرپرسیارێتی لە ئەستۆی هەمووان دایە، بەڵام کلیلی چارەسەر لە گیرفانی هێزە دەستەڵاتدارەکان دا دەدۆزرێتەوە، جا ئەگەر هێزە دەستەڵاتدارەکان و حکومەتی هەرێمی کوردستان بەکردەوە هەنگاوی چاکسازی هەڵنەگرنەوەو رێ لە کاروانی ناعەدالەتی نەگرن کە ئێستا باشووری کوردستانی نغرۆ کردوە، ئەگەر سنوورێک بۆ دەوڵەمەندە هەڵتۆقیوەکان دانەنێن و ژمارەیەک گەندەڵکارو بازرگانی بێویژدان رووبەڕووی دادگە نەکەنەوە، ئەگەر دیواری نێوان خەڵک و بەرپرس نزم نەکەنەوەو سنوورێک بۆ نابەرابەری دانەنێن، ئەگەر گوێ لە خواست و داخوازیەکانی خەڵک نەگرن و بە کردەوە یاسا سەروەر نەکرێت، نەک هەر دۆخە ئاڵۆزەکە هێور نابێتەوە، بەڵکو ئاکام ژەهرە تاڵەکەمان دەرخوارد دەدات.

رێکار ئەحمەد

rekarahmed@hotmail.com

rekarahmed@yahoo.de